ҚҰРМЕТТІ ОҚУШЫ!
Бұл оқулық арқылы компьютердің құрылғылары, компьютерлік желілер, ақпаратты өлшеудің алфавиттік әдістері, электрондық кестелермен жұмыс жасау, нысанға бағытталған программалау ортасында алгоритмдер құру мен программалау негіздерін үйренесің.
Жаңа білім мен тәжірибені меңгеруде түрлі сұрақтарға жауап табуға, бірлесе талқылау арқылы тұжырымдар жасауға, практикалық, шығармашылық оқу тапсырмаларын орындау кезінде жеке ақпараттық-коммуникативтік сауаттылығыңды жетілдіруге мүмкіндік аласың. Оқулықта берілген шығармашылық, практикалық алгоритмдеу, модельдеу, жобалау, зерттеу тапсырмалары қызықты әрі пайдалы. Тапсырмалар сыни тұрғыдан және логикалық ойлау-
ды дамыту мақсатында берілген. Жаңа тақырыптар қарапайымнан күрделіге бірте-бірте ауысып отырады. Тапсырмалар өз бетінше орындау дағдыларын игеруге арналған. Оқулықта берілген материалға жан-жақты талдау жасап, қорытындылап, өмірде қолдана білу үшін үлгі жобаларыңды ұсынуды үйренесің.
Оқулықтың басым бөлігіндегі тақырыптар программа өңдеудің кіріктірілген ортасы мен алгоритмдеуге бағытталған. Қазіргі қоғамда алгоритмдеудің рөлі, оны пайдаланудың техникалық аспектілерімен ғана айқындалмайды. Алгоритмдік қатынас – адамның күнделікті өмірі мен жұмысының ажырамас бөлігі. Көп жағдайда адам қызметінің нәтижесі оның әрекеттерінің алгоритмдік мәнін қаншалықты дәл білетініне тәуелді: әр мезетте, қандай ретте не істеу керек; әрекеттер қорытындысы қандай болу керек? Бұл белгілі дәрежеде алгоритмдерді құрастыру мен пайдалана білуге қатысты.
Алгоритм құрастыру, жазу түсініктері беріліп, қазіргі кезде кең тараған программалау ортасының бірі – Lazarus-тың ерекшеліктері қарастырылады, математика, физика есептері компьютермен есептеу барысында қолданылады.
Информатика пәнінде алған білімің мен жаңа тәжірибені келешекте өзің қалаған мамандықта, мысалы: зерттеуші ғалым, бизнес саласында, ІТ маман, дизайнер, ұстаздық қызметте, робот техника маманы, сәулет, кино өнері, кәсіпкерлік, ауылшаруашылық, қолөнер т.б. салаларда жақсы маман болу үшін пайдалана аласың. Пайдалы білім алу – ынта-ықылас пен зейінді қажет етеді.
Сәттілік тілейміз!
