ҚҰРМЕТТІ ОҚУШЫ!

   «Информатика» пәні – бастауыш сыныпқа арналған «Ақпа­раттық-коммуникация­лық технологиялар» (АКТ) пәнінің жалғасы. Информатика (ағылш. Computer science; фор. informatique) – компьютер және басқа да техникалық құрылғылардың көмегімен ақпаратты алу, сақтау, түрлендіру, жеткізу жолдарын зерттейтін ғылым саласы.
   ​Сен «Информатика» пәнін оқу барысында қоршаған ортадағы ақпараттың түрлерімен танысып, ақпарат беру, шифрлау, ақпа­ратты екілік кодта ұсыну жолдарын үйренесің. Компьютерлік графиканың негізгі элементтеріне жататын векторлық және растр­лық графикамен, олармен жұмыс істеуге арналған программалармен танысасың.
   ​Өткен оқу жылында АКТ бойынша алған біліміңді одан әрі да­мы­та отырып, «Lego Mindstorms EV3» роботы жинағына ене­тін гироско­пия­лық датчик жұмысын үйренесің. Роботтехника жарыстарында сызық бойымен жүретін, робо-сумо жарыс­тарына қатысатын робот жобасын құрастырып, роботқа арнап программа жазасың.
   ​Компьютерде жұмыс істейтін әр пайдаланушы үшін ақпараттық қауіпсіздіктің маңызы ерекше. Интернетте қауіпсіз жұмыс істеуді, плагиатқа жол бермеуді, интернеттен көшірілген ақпарат­қа

нұсқама беруді үйренесің. Компьютерді пайдаланушы ретінде мәтіндік редакторда жасаған файлдарыңды қорғау жолдарын білетін боласың. Сонымен қатар желіде сыныптастарың, таныстарың, достарыңмен ортақ бумада орналасқан файлдармен бірлесе жұмыс істеуді меңгересің.
   ​«Информатика» пәнінің соңғы тақырыптарында жобаның түр­лерімен, жоба дайындаумен оны көпшілік ортада қорғау әдіс­терімен танысасың. Берілген тақырыптар бойынша жоба жұмыс­тарын дайындайсың.
   Бұл оқулықтың CD қосымшасы мен электрондық нұсқасы бар.
   ​​«Информатика» пәнін оқуда ынта мен жігер, ықылас пен зейінділік таныт.

Біз, авторлар, саған сәттілік тілейміз!